Mga mag-aaral ng CDC, hirap sa transisyon pa-F2F classes

TL;DR

  • Malaking tulong ang iba’t ibang mga learning hubs sa kolehiyo. Nagkakaroon lamang ng kalituhan sa kasalukuyang porma ng transisyon.
  • Tingin ng ilang mga estudyante, nasa sistema mismo ng pagpapalit ng porma ng klase ang ugat ng kanilang mga problema.

[Updated 12:42 a.m.] Sa pangangalahati ng kasalukuyang semestre, kinakaharap ng ilang mga mag-aaral ng College of Development Communication (CDC) ang iba’t ibang mga suliraning kakabit ng transisyon mula sa remote learning patungo sa hinahangad na face-to-face (F2F) classes.

At sa limang learning hubs na binuksan kamakailan sa palibot ng CDC Building makikita ang iba’t ibang karanasan ng mga estudyante na naghahanap ng isang ligtas, tahimik, at komportableng lugar upang mapagsabay ang magkakahalong porma ng pagpasok sa klase.

“Learning hubs are spaces where students can reflect, review, and work on their course activities using their laptop. I also see students use the learning hubs as spaces for course-related face-to-face group meetings,” pagtingin ni CDC Dean Maria Stella Tirol sa isang panayam sa Tanglaw.

Ayon sa datos mula sa UPLB College of Development Communication Student Council (CDC-SC), 66% ng 206 na mag-aaral na sumagot sa ipinakalat na sensing form ang kasalukuyang nakatira sa Los Baños. Pitumpu (70) naman ang bumabiyahe nang uwian mula sa mga karatig na lalawigan at sa Metro Manila.

Hiling ng ilang mga mag-aaral, patuloy na magkaroon sana ng ‘lenient’ na mga polisiya habang nasa panahon pa ng pagta-transisyon patungong full-blown face-to-face classes. (Dan Alexander Abas, Tanglaw staff)

Pagpasok pa lamang ng gusali ay bubungad agad ang isang pasilyong na nagsisilbing learning hub, na nililinyahan ng mga mag-aaral na dumalo sa kanilang mga online classes. Isa rin sa mga pasilidad na ginawang learning hub ay ang CDC Reading Room, kung saan mas maraming mag-aaral ang makikitang nananatili rito. Sa pabago-bagong panahon sa Los Baños, hindi hamak na mas maaliwalas ang espasyong air-conditioned, at may mga bukas na computer para sa mga nangangailangan nito.

Nagsisilbi rin itong panuluyan para sa mga mag-aaral na wala pang dormitoryo at kinakailangang bumiyahe nang ilang oras upang makadalo sa kanilang mga face-to-face na klase, gaya ng sophomore na si Micah Alawas.

“Uwian ako and I have to commute everyday from home to class and then back. Medyo tiring siya for now and very taxing din since whole day ang class ko. Minsan hanggang 5:30 p.m. Feeling ko better sana if naka dorm,” kuwento ni Micah.

Sa kaniyang pakiwari, malaking tulong ang nasabing learning hub. “Very conducive kasi ‘yung learning facility kasi it’s quiet and walang distractions, so I’m able to study well. Nagpupunta ako rito for at least three weeks na and every time na pumupunta ako rito ay I’m always productive and I always get things done.”

Nag-aaral si Micah Alawas sa isang sulok ng CDC Reading Room. (Dan Alexander Abas, Tanglaw staff)

Sa Reading Room rin naglalagi ang sophomore na si Karen Bombase, na hindi napigilang ipahayag ang kanyang labis na kapaguran at pagkabagabag dahil sa kasalukuyang panahon ng transisyon.

“Ang hirap. Sobrang hassle mag-class ngayon. Lalo na kapag mixed ‘yung process mo like face-to-face then online, mangangarag ka talaga. Ako, personally, nangangarag ako […] everyday, ganoon ‘yung situwasyon ko,” salaysay ni Karen sa Tanglaw.

Inamin din niya na isa rin sa kaniyang kinaharap na suliranin sa paggamit ng learning hub ay ang mabagal na internet connection, na nakaaapekto umano sa kaniyang mga gagawin.

“Mamomroblema ka pa kung may internet. Tapos mamaya, ‘yung internet pala rito sa campus ay hindi kasing stable unlike sa dorm. So nakakapagod din na babalik ka pa sa dorm tapos ang next class mo ay ganoon ulit [face-to-face] so ang hassle. Mahirap talaga.”

Isa sa mga agam-agam ng mag-aaral na si Karen Bombase ang panaka-nakang pagkawala ng internet sa CDC Building. (Dan Alexander Abas, Tanglaw staff)

Sa araw rin na iyon, namataan naman sa hallway sa unang palapag ng CDC Building ang junior student na si Aubrey Semaning. Sa kasamaang palad ay hindi niya nagamit ang pasilidad dahil nagkakaproblema umano ang kaniyang koneksyon sa UPLB Wi-Fi. 

“Sobrang hirap magklase dahil sa dorm namin, ‘yung Wi-Fi ay common Wi-Fi so lagi akong naki-kick sa meeting. Dito naman, wala ring Wi-Fi so kanina pa ako nagre-reload,” dismayadong salaysay ni Aubrey. “First time ko pumunta ngayon, tapos wala ring Wi-Fi.”

Matagal nang panaka-naka ang internet connection sa loob ng gusali, at mas problema rin ang kawalan ng mobile signal. Batid ang mga ganitong suliranin, inanunsyo naman ni Dean Tirol sa isang student consultation noong Okt. 3 ang ilang mga hakbang upang mapalakas ang internet connection sa loob ng gusali, gaya ng pagsasaayos ng routers at iba pang mga updates kasama ang mga kawani ng UPLB Information Technology Center (UPLB-ITC).

“In the College level, we have already upgraded to Fiber network since 2020 and recalibrated the Wi-Fi access points especially in the learning hubs and Annex Rooms,” ayon kay Charlene Arkaina, isang CDC instructor na nakatoka sa Internet infrastructure sa kolehiyo, sa isang statement na ibinahagi sa Tanglaw.

Isa rin umano sa dahilan ng pagbagal ng internet connection ay ang “increased number of users” sa unibersidad, paliwanag ni Arkaina. Tiniyak naman ng opisyal na ang problemang ito ay patuloy na hinahanapan ng solusyon.

“Rest assured the university and the college has on-going procurements to upgrade the infrastructure and facilities the soonest possible for our students,” kwento niya.

Mistulang nagloloko ang internet sa araw ng pagpunta ni Aubrey Semaning sa isang learning hub sa unang palapag ng CDC Building. Ayon sa CDC administration, patuloy silang nagsasagawa ng mga hakbang upang maisaayos ito. (Dan Alexander Abas, Tanglaw staff)

Pangmalakihang suliranin

Ang pagharap ng mga mag-aaral sa mga problemang bumabagabag sa mga hakbang gaya ng learning hubs at iba pang learning spaces ay maiuugat sa biglaang pagbabago ng pamamaraan ng pagsasagawa ng klase sa UP, paliwanag ni Rich Adriel De Guzman, isang dating konsehal ng CDC-SC at dating kasapi ng National Union of Students of the Philippines – Southern Tagalog (NUSP-ST). 

“One of the main factors on why issues such as the lack of learning spaces and stable internet connection is because of the learning modality policies […] and how it was implemented this semester,” ayon kay De Guzman.

Matatandaang noong Hulyo nitong taon ay naglabas ng memorandum ang unibersidad ukol sa pag-transisyon mula sa nakagawiang online classes papunta sa blended learning, na isa umano sa mga hakbang tungo sa malawakang pagbabalik ng face-to-face classes sa buong unibersidad.

“The three learning models continue to confuse students and give them a hard time especially in attending online and F2F classes in the same day given the current situation of learning spaces within the college and university,” dagdag pa ni De Guzman.

Sa mga agam-agam patungkol sa mga polisiyang katulad ng istriktong pagpapatupad ng minimum absences rule, sinabi naman ni CDC-SC Chairperson Shey Levita na hindi muna dapat ganito ang kaso habang may mga nakaasa pa rin sa internet connection para makadalo sa mga klase.

“Hangga’t may mga kasama tayong mag-aaral na nakadepende sa internet connection para sa kanilang pag-attend sa klase at wala sila sa ating campus, hindi pa rin nararapat na magkaroon tayo ng strict na implementation ng absences sa online set up,” aniya.  “Hindi sa lahat ng oras ay may malakas at matibay na koneksyon kaya hindi ito nararapat na gawing rason upang ipatupad ang mga anti-estudyanteng panukalang ito.”

Nagkakaroon ng kalituhan sa mga estudyante, lalo na kapag nagsasabay-sabay ang face-to-face at virtual synchronous sessions nila sa loob ng iisang araw. (Dan Alexander Abas, Tanglaw staff)

Maiuugnay rin ang diskusyong ito sa inilabas na five-point student demands towards safe re-opening of classes ng UPLB University Student Council (USC) noong Setyembre 27, kung saan ipinahayag ang mga dapat isaalang-alang ng UP administration upang masiguro ang ligtas at inklusibong pagbabalik sa face-to-face classes.

Isa sa mga inihaing panawagan ay ang pagsisiguro sa mas ligtas, madali, at inklusibong paggamit ng mga pasilidad sa loob ng campus, kung saan matitiyak ang kaligtasan ng bawat mag-aaral at manatiling aksesibo ang mga kagamitan para sa lahat upang mapaigting ang academic freedom sa buong institusyon.

Nakasentro naman ang iba pang mga panawagan sa pagkakaroon ng logistical at financial assistance sa mga nangangailangang mag-aaral, pagpapanatili ng academic ease policies sa panahon ng transisyon, pagsali ng mga kinatawan ng mga mag-aaral sa paggawa ng mga polisiya, at ang paghingi ng tamang pondo upang maisaayos ang mga pasilidad ng unibersidad.

Matapos ang ilang linggong pakikipag-usap, nagkaroon ng diyalogo ang USC at ang administrasyon ng UPLB noong Lunes, Nob. 7, upang pag-usapan ang nalalapit na pagbalik ng face-to-face classes pati na rin ang mga hinaing na inihayag ng sangkaestudyantehan ukol sa kasalukuyang setup. Ayon sa isang anunsyo ng UPLB USC, ilalabas ang isang buod ng nasabing dayologo sa mga susunod na araw. 

Nararanasan ng UP ang mga suliraning kaugnay unti-unting pagbabalik sa face-to-face classes, sa kabila ng ipinataw na budget cut ng Department of Budget and Management (DBM) sa badyet nito sa 2023. Matatandaang aabot sa halos P22.3 bilyon ang tinapyas ng DBM sa budget proposal ng UP, malayo sa hinihingi ng unibersidad na P44.1 bilyon.

May mga oras na walang pumupunta sa learning hubs, gaya na lamang sa 2nd floor hallway. (Dan Alexander Abas, Tanglaw staff)

Planuhin nang maayos

Dagdag ni de Guzman ng NUSP-ST, hindi naman umano maikakaila na sa kabila ng mga problemang kaakibat sa transisyon, ang mga hakbang gaya ng pagbubukas ng mga learning hubs ay nagbigay umano ng oportunidad sa mga mag-aaral. 

“As a student of CDC, the opening of additional learning hubs within the college is a huge development in ensuring that students have more accessible learning spaces within the university given the hybrid learning setup of the semester,” paliwanag ni De Guzman.

Ngunit, hindi umano dapat dito matapos ang mga hakbang na isinasagawa ng mga kinauukulan sa mas pagpapalawig ng kanilang maibibigay na tulong sa mga mag-aaral. “The college must still continue to consider the different concerns and feedback raised by the students with regards to the learning academic policies which affect the students’ performance.”

Sinegundahan naman ito ni Levita, at kaniyang idiniin na mahalaga ang mga hakbang kagaya ng pagtatayo ng learning hubs. “Napakahalaga ng espasyong ito lalo na ngayon sa mga kasama nating estudyante na walang conducive space sa kanilang mga pinags-stay-an na lugar,” saad ni Levita sa Tanglaw.

Mas dapat din umanong pagtuunan ng pansin ang mga bumabagabag na problema sa internet at paigtingin ang panawagang ligtas na pagbabalik-eskwela.

“Ang hirap. Sobrang hassle mag-class ngayon. Lalo na kapag mixed ‘yung process mo like face-to-face then online, mangangarag ka talaga. Ako, personally, nangangarag ako…”

Karen Bombase, isang mag-aaral

Habang nag-aaral sa Reading Room, inilahad ni Karen ang kaniyang naging karanasan sa nagaganap na transisyon. “Actually, naga-adjust pa rin ako and mahirap siya pero feeling ko ay papunta na rin naman tayo sa full-blown face-to-face so isang way siguro ito sa pagt-transisyon.”

“Mas maganda na i-plan [ang policies] nang maayos para on both ends, hindi mahirap sa admin and hindi mahirap sa professors, especially sa students,” dagdag pa nito.

Nanawagan naman sa mga kinauukulan ang mag-aaral na si Aubrey, na hindi pinalad sa internet kahit nasa learning hub na siya.  “Maging mas lenient pa rin ang mga policies natin para maging student-friendly siya.” 

“It’s nobody’s fault naman na mabagal ang internet and we’re all trying our best to perform well.”

Advertisement

One thought on “Mga mag-aaral ng CDC, hirap sa transisyon pa-F2F classes

Sarado na ang mga puna.